खेत मासेर वस्ती विकास

समाचार

गृहपृष्ठ
समाचार
खेत मासेर वस्ती विकास

खेत मासेर वस्ती विकास

सोमबार, कात्तिक ४, २०७६ ओखलढुंगाखबर सम्बाददाता

रामपुर । मोलुङ गाउँपालिका वडा नं. २ रामपुरमा दुई दशक पहिले छिटपुट घर र अधिकांश खेतबारीमा हरियाली बालि देखिन्थ्यो । धान र तोरी उत्पादनका हिसावले जिल्लाकै अब्ब मानिएको रामपुरटार अहिले आधाभन्दा बढी घरले ढाकिएको छ । धान उत्पादन हुने खेतमा धमाधम घर निर्माण भइरहेका छन् ।
रामपुरको स्थानीय पुष्पराज दाहालले पहिले खेतमा बाली लगाउँदा बस्ने खेति घर मात्रै भए पनि अहिले वस्तीकै रुपमा घर निर्माण हुन थालेको बताए । उनले भने, ‘पहिले एकाध खेतिघर, थिए, अहिले सडक पुगेपछि खेत नै घडेरीका रुपमा विकास गरेर खेतमै वस्ती विस्तार भइरहेको छ ।’
सडक पुगेपछि सुविधा भएकाले टाढा घर भएका र बाहिरबाट आउनेले घडेरी किने धमाधम घर बनाउँदा खेतमै वस्ती विस्तार भएको दाहालको भनाइ छ । रामपुर मात्रै होइन, चिसंखुगढीको सेर्नाबेँसी गाउँपालिककै सबैभन्दा बढी धान गहुँ र आलु उत्पादन हुने खेत हो । तर, अहिले यहीँ गाउँपालिकाको केन्द्र परेपछि सडक निर्माण गरेर खेतमा घडेरी विक्रि गर्न थालिएको छ । स्थानीय चिरण भट्टाराईका अनुसार विस्तारै खेत घडेरीका रुपमा कारोबार भइरहेको छ । खेति गर्ने कामदार पाउन छोडेको अवस्थामा सडक पुगेपछि खेत घडेरीका रुपमा प्रयोग हुन थालेको उनले बताए ।
जिल्लाका अन्य जरायोटार, टोक्सेलको हर्कपुर लगायतका क्षेत्रका खेत मासेर अहिले तीब्र शहरिकरण भइरहेको छ । हर्कपुरमा घडेरी प्लटिङ गरेर खेतियोग्य जमिन बाँझो बनाइएको छ । स्थानीयले सुविधाका हिसावले खेतियोग्य जमिन मासेर सडक पुर्याएपछि धमाधम वस्ती विकास भइरहेको छ । यसले उत्पादनशील जमिन कंक्रिडमा परिणत हुने स्थानीयको चिन्ता छ । मैदानमा सडक पुगेसँगै धान गहुँ र तोरी उत्पादन हुने क्षेत्र घडेरीका रुपमा विक्रि भइरहेका छन् ।
जिल्लाका मुख्य उत्पादन क्षेत्र नै घडेरीका रुपमा विकास हुन थाले पछि धान उत्पादन धट्न थालेको छ । कृषिमा लगानी गर्ने कृषक समेत घट्दै गएपछि उत्पादनमा ह्रास आउन थालेको कृषि ज्ञान केन्द्रका प्राविधिक हेम आलेले बताए । उनका अनुसार वर्षेनी ओखलढुंगाको उत्पादन घट्दै आएको छ । दैनिक उपभोग्य वस्तुको आयत हरेक वर्ष बढेको उद्योग बाणिज्य संघका अध्यक्ष ज्ञानेन्द्र मास्केले बताए ।
गाउँसम्मै आयतित चामल र तरकारी समेत ढुवानी हुन थालेकाले जिल्लाको उत्पादन घट्दै गएको पुष्टि हुने उनले जनाए । कृषियोग्य जमिन मासिने र खेति गर्न क्रमशः छोड्ने प्रचलनले ओखलढुंगा परनिर्भर हुने अवस्था आएको सरोकारवालाको भनाइ छ ।

प्रकाशित मिति: सोमबार, कात्तिक ४, २०७६ २०:१८

प्रतिक्रिया दिनुहोस्