अपरेशन थिएटर छैन अस्पतालमा

स्वास्थ्य

गृहपृष्ठ
स्वास्थ्य
अपरेशन थिएटर छैन अस्पतालमा

अपरेशन थिएटर छैन अस्पतालमा जिल्ला अस्पतालको विजोग

आइतबार, कात्तिक ३, २०७६ शुभकला राई

ओखलढुंगा । अपरेशन थिएटर नहुँदा ओखलढुंगाको जिल्ला अस्पताल रुम्जाटारले स्थानीयको विश्वासनियता गुमाउँदै गएको छ । भवन अभावका कारण हालसम्म यो सेवा सञ्चालनमा नआउँदा मेजर अपरेशन गर्नुपर्ने विरामीलाई रिफर गर्नुपर्ने बाध्यता छ ।

१५ शैय्याको जिल्ला अस्पताल रुम्जाटार २०६६ सालमा स्थापना भएको अस्पताल हो । यो अस्पतालले नेपाल सरकारको नियमानुसार सबै सेवाहरु दिइरहे पनि शल्यक्रिया सेवा भने दिन सकेको छैन । भवन अभाव देखाउँदै अस्पतालले अपरेशन थिएटर सञ्चालनमा नल्याएको हो । अस्पतालमा अहिले सामान्य अपरेशन हुने भएपनि जटिल खालको अपरेशन हुँदैन । जसका कारण अस्पतालले मेजर अपरेशन गर्नुपर्ने विरामी र उच्च जोखिममा रहेका महिलाहरुलाई सुत्केरी गराउन रिफर गर्नुपर्ने अवस्था रहेको अस्पतालका प्रमुख मुकुन्दप्रसाद यादवले बताए ।

यो अस्पतालले अन्तरंग सेवा र वहिरंग सेवा अन्तर्गत पर्ने सबै सेवा दिँदै आएको छ । अरु आकर्षक सेवाहरु पनि अस्पतालमा सञ्चालनमा छन् । यहाँ एकद्वार संकट व्यवस्थापन केन्द्रले हिंसापीडित र मानसिक समस्याका विरामीलाई निःशुल्क उपचारदेखि परामर्श समेत दिँदै आएको छ । जेष्ठ नागरिकलाई ३० प्रतिशत् छुटमा किन्नु पर्ने औषधि उपलब्ध छन् । रक्तचाप, डाइविटिज, क्षयरोगजस्ता रोगका औषधि विरामीलाई निःशुल्क छ । उपचार गराउन खर्च नै नभएका विरामीलाई डाक्टरको सिफारिसमा पूर्ण निःशुल्क सेवा छ । यति सेवा हुँदा पनि अस्पतालमा वहिरंग सेवामा सेवा लिने विरामीको संख्या दैनिक औसतमा ७० जना मात्रै छ । अन्तरंग सेवा अन्तर्गत भर्ना भएर उपचार गराउने विरामीको संख्या त झन् शून्यजस्तै छ । अपरेशन थिएटर नभएकै कारण अस्पतालले विरामीको विश्वासनियता गुमाइरहेको छ ।

अस्पतालमा अहिले ७ जना चिकित्सक कार्यरत छन् । अन्य जनशक्ति र सुविधा पनि प्रशस्तै छ । तर उपभोग गर्न विरामी भने कमै मात्रामा जाने गरेका छन् । अस्पतालको निर्माणाधीन भवन पनि सम्पन्न हुने चरणमा छ । यो अस्पतालको विश्वासनियता बढाउन जतिसक्दो चाँडो अपरेशन थिएटर सञ्चालनमा ल्याउनु जरुरी देखिएको छ ।

प्रकाशित मिति: आइतबार, कात्तिक ३, २०७६ ०८:१७

प्रतिक्रिया दिनुहोस्