१० वर्ष बित्दासमेत भवन बनेन

समाचार

गृहपृष्ठ
समाचार
१० वर्ष बित्दासमेत भवन बनेन

१० वर्ष बित्दासमेत भवन बनेन उमा कट्वाल क्याम्पसको भवन अधुरै

आइतबार, कात्तिक ३, २०७६ शुभकला राई

उमा कट्वाल क्याम्पसको भवन अलपत्र

ओखलढुंगा । ओखलढुंगाको सिद्धिचरण नगरपालिका वडा नं. २ स्थित निशंखेको उमा कट्वाल क्याम्पसको भवन १० वर्ष बितिसक्दा पनि निर्माण सम्पन्न हुन सकेको छैन । भारतीय दूतावासको सहयोगमा तत्कालीन जिल्ला विकास समितिको कार्यालय अन्तर्गत रहेको प्राविधिक कार्यालयमार्फत निर्माण थालिएको भवन ठेकेदारको लापरवाहीको कारण सम्पन्न नभएको हो ।

२०६६ सालमा भारतीय दूतावासको सहयोगमा निर्माण थालिएको भवन अझै अलपत्र छ । एक वर्षभित्र निर्माण गर्नेगरी १ करोड ४२ लाख रुपैयाँ लागतमा यो भवन निर्माणको जिम्मा ‘विरुवा पुष्पाञ्जलि जेभी प्रालि’ ले पाएको थियो । भवन निर्माणका लागि तत्कालीन जिल्ला विकास समितिको कार्यालय अन्तर्गत रहेको प्राविधिक कार्यालयले बारम्बार म्याद थप्ने, ताकेतापत्र पठाउने र स्पष्टीकरण सोध्ने काम गरेपनि भवन निर्माण हुन सकेन । भवन निर्माणमा अहिलेपनि ठेकेदार कम्पनीले आलटाल गरिरहेको छ । यो भवनको काम अन्तिम चरणमा पुगेर रोकिएको छ । भवन निर्माण सम्पन्न गर्नका लागि स्थानीयहरु विभिन्न कार्यालयमा पुगेर दबाब दिइरहे पनि सुनुवाई नभएको भवन निर्माण समितिका पूर्व संयोजक पदमकुमार तामाङले बताए ।

तत्कालीन समयमा ठेकेदार कम्पनीले सुनकोसीमा पुल नभएको, कच्ची सडकमा सामान ढुवानी गर्न समस्या भएको, सालको काठ नपाइएकोलगायतका बहाना बनाउँदै आएको थियो । अहिले यो भवनको करिब ९० प्रतिशत् काम सम्पन्न भइसकेको छ । भवनको वरिपरि पर्खाल, गेट, झ्याल ढोका, वायरिङ फिट गर्नेलगायतका काम बाँकी रहेको छ । बाँकी काम सहजै सम्पन्न हुनेमा स्थानीय विश्वस्त छैनन् ।

भवन निर्माणका लागि ठेकेदार कम्पनीलाई ८३ लाख २१ हजार रुपैयाँ भुक्तानी भइसकेको छ । तर अहिले भवन निर्माण ढीला भएकै कारण बाँकी रकम जिल्ला समन्वय समिति र दूतावासमध्ये कसले भुक्तानी गर्ने भन्ने विषयमा अन्योलता समेत बढेको छ । भवन नबनेपछि भारतीय दूतावासले ओखलढुंगा जिल्लामा अरु भवनका लागि सहयोग नगर्ने चेतावनी ५ वर्ष अघि नै पठाएको थियो ।

प्रकाशित मिति: आइतबार, कात्तिक ३, २०७६ ०७:१४

प्रतिक्रिया दिनुहोस्