डाक्टर बन्न हिँडे, खेलाडी बने

खेलकुद

गृहपृष्ठ
खेलकुद
डाक्टर बन्न हिँडे, खेलाडी बने

डाक्टर बन्न हिँडे, खेलाडी बने

सोमबार, कात्तिक ४, २०७६ मनोज भट्टराई

ओखलढुंगा । सुनकोसी गाउँपालिकास्थित सिस्नेरीमा २०४९ मंसिरमा जन्मेका गुणराज रुचाल एसएलसी उर्तीण हुनासाथ डाक्टरी पढ्न सदरमुकाम ओखलढुंगा आए । यहाँ एसएलसी तहको सिएमए पढे । यतिबेला सम्म उनले स्वास्थ्यकर्मी बन्ने योग्यता बनाइ सकेका थिए । कतै जागिर खान्छु होला भन्ने सोच बनाएका उनी अहिले चर्चित खेलाडी बनेका छन् । विद्यालयमा पढ्दै उनले १० वर्षदेखी कराते सिकेका थिए । खेलकुदमा उनको रुची थियो । तर, खेल क्षेत्रमा आउने सपना देखेका थिएनन् । उनी त स्वास्थ्यकर्मी बन्ने ध्येयले सिएमए पढ्न आएका थिए । उनी भन्छन्, ‘स्कूल पढ्दै खेलकुदमा रहर थियो, तर खेलाडी बनिन्छ भनेर सोचेको थिएन ।’
साबिक सिस्नेरी गाविसको देबिटारमा बुबा खड्ग रुचाल आमा फुलमाया रुचालका पहिलो सन्तानका रुपमा जन्मिएका रुचाल अहिले २६ वर्षका भए । उनले यो बीचमा स्वास्थ्यकर्मी बन्न पढेको पढाइ छाडेर नेपाली सेनाको जागिर खाए । त्यस अघि उनी खेलाडीका रुपमा स्थापित भइसकेका थिए । अहिले उनी नेपाली सेनाको त्रिभुवन आर्मी क्लवमा कार्यरत छन् । उनले १० बर्षको उमेरमा कराँते खेल एक महिना सिके । ५ बर्ष अघि मात्र उच्च माध्यमिक शिक्षा अध्ययन सकेका गुणराज ०६९ सालमा नेपाली सेनामा भर्ती भएका हुन् । उनको खेलप्रतिको मोह यथावत् थियो । जीवनयापन सहज पार्न मात्रै जागिर खानु परेकोे बताउने उनी बीचमा छाडेको कराँतेको प्रशिक्षण सेनामा भर्ती भएसँगै निरन्तरता दिए ।
०६४ को एसएलसी सकिनासाथ स्वास्थ्य विषयमा सीएमए अध्ययन गरे । लगत्तै ०७० मा उनले उच्च माध्यमिक तहको शिक्षा पुरा गरे । कराँतेमा अब्बल रहेका उनले ‘आइकिडो’ खेलको प्रशिक्षण भने गुरु धन गुरुङबाट लिएका थिए । खेलप्रतिको अगाध स्नेहकै कारण आफ्नो देश नेपाल चिनाउने खेलाडी बन्नुपर्छ भन्ने धारणा विकास भएका बताउँछन् । निरन्तरको प्रयासपछि ०७२ सालमा क्योकुसिन कराँतेमा उनले कालो पेटी (ब्ल्याक बेल्ड) बाँधेरै छाडे । त्यसपछि खेलको अर्को खुड्किलो मुवाथाई शुरु गरे । मुवाथाई सुरु गरेकै बर्ष उनी थाइल्यान्डमा भएको विश्व प्रतियोगितामा भाग लिने अवसर पाए । त्यहि खेलले राष्ट्रिय संघबाट ‘प्लेयर अफ द इयर– २०१६’ बाट सम्मानित भए ।
खेल क्षेत्रमा रुचालको लक्ष्य अनुसार उपलब्धी पनि हासिल हुँदै गए । सन् २०१८ मा भएको ‘इन्डो नेपाल मुवाथाई च्याम्पियनसिप’ मा भारतीय खेलाडीलाई पराजित गर्दै उनी स्वर्ण पदक जित्न सफल भए । त्यसै बेला उनलाई नेकपाका अध्यक्ष तथा पूर्व प्रधानमन्त्री पुष्पकमल दाहाल प्रचण्डले सम्मान समेत गरे । उनले सन् २०१८ मा थाइल्यान्डमा भएको अर्को च्याम्पियनसिपमा पनि भाग लिने मौका पाए । अक्टोबर महिनामा नेपालमा भएको ‘थर्ड के ब्याग अन्तर्राष्ट्रिय च्याम्पियनसिप’ मा पनि भारतीय खेलाडीलाई पराजित गरे । त्यसबेला पनि उनको पोल्टामा स्वर्ण पदक नै प¥यो ।
खेल हो, अनेक दुर्घटना हुन्छन् तर, उनको लक्ष्य कहिले पनि घाइते भएन । सन् २०१८ कै डिसेम्बरमा कम्बोडियामा भएको दोस्रो ‘विश्व कुन खमेर’ प्रतियोगितामा पनि उनले सहभागिता जनाए तर, त्यसबेला उनको हातमा चोट लागेका कारण सोचे जस्तो परिणाम हात नलागेकोमा उनी दुःखी छन् । कठिन संघर्ष लगातार चलिरहँदा उनले अवार्ड पाउने क्रम भने रोकिएन । २०१९ को जनवरीमा नेपाल राष्ट्रिय मुवाथाई संघबाट दोस्रो पटक ‘मुवाथाई प्लेयर अफ द इयर– २०१८’ को सम्मान पनि गुणराजले नै पाए ।
अहिले खेल क्षेत्रका अनेक विधामा उनको सहभागिता रहँदै आएको छ । मुवाथाईबाहेक उनी ‘फस्र्ट फायर स्टिक ब्वाई’ करातेको ब्ल्याक बेल्ट, सआइकिडोको ब्ल्याक बेल्ट, रेस्लिङको रेफ्री, जुडो र बक्सिङ खेलका पनि उनी जानकार हुन् । उनी खेल जीवनमा अगाडी रहेजस्तै सैन्य सेवाको नेपथ्यमा पनि छैनन् । नेपाली सेना हुनुमा गर्व गर्छन् उनी । नेपाली सेनाले विश्वमा नाम कमाएको, नेपालको नाम चिनाएका अन्य विधा छन् । ‘मलाई पनि खेल क्षेत्रबाट सेना र देशको नाम उज्वल बनाउने रहरले जरा गाडिसकेको छ ।’ उनले समृद्ध नेपालसँग भने ।

प्रकाशित मिति: सोमबार, कात्तिक ४, २०७६ २०:२५

प्रतिक्रिया दिनुहोस्