ओखलढुंगा । जिल्लाको नेपाली कांग्रेस मोलुङ गाउँपालिका वडा नं ४ गाउँ कार्य समिति बेथिति, विसंगति र भ्रष्टाचारविरूद्ध उभिएको छ । समितिले वडाभित्रका ३ वटा छुट्टाछुट्टै सार्वजनिक कार्यालयसँग सूचना माग गरेको छ ।
समितिले मोलुङ गाउँपालिका ४ नं वडा कार्यालय, जलजलेश्वर वेद विद्याश्रम माध्यमिक विद्यालय र जीवन प्रदीप माविमा छुट्टाछुट्टै रुपमा सूचना माग गरेको हो । समितिले बेथिति, विसंगति र भ्रष्टाचारका विषयहरु खोजतलास गरी जनतासामु उजागर गर्न सूचना माग गरेको जनाएको छ ।
मोलुङ गाउँपालिका ४ नं वडा कार्यालयसँग स्थानीय निर्वाचन भएयतामा वडा कार्यालयले सञ्चालन गरेको योजना, बजेटको खर्च विवरण, योजनाहरुको प्रगति विवरणसहितका विवरणहरु माग गरिएको छ । यस्तै जीवन प्रदीप मावि र जलजलेश्वर वेद विद्याश्रमसँग आर्थिक हिसाबकिताव नदेखिएको, खर्च पारदर्शी ढंगले नहुने गरेको जनगुनासो आएको भन्दै लेखापरिक्षण रिपोर्ट, दाताहरुबाट विद्यालयलाई प्राप्त सहयोगको हिसाब किताबलगायत माग गरिएको वडा सभापति भोलाराज राईले जानकारी दिए ।
