ऐतिहासिक क्षेत्र ओखलढुंगा सदरमुकाम

पर्यटन

गृहपृष्ठ
पर्यटन
ऐतिहासिक क्षेत्र ओखलढुंगा सदरमुकाम

ऐतिहासिक क्षेत्र ओखलढुंगा सदरमुकाम

आइतबार, कात्तिक ३, २०७६ नवराज कार्की

ओखलढुंगा । ऐतिहासिक एवं साहित्यिक हिसाबले ओखलढुंगा सदरमुकामले विशेष महत्व बोकेको छ । महाभारत कालमा भीमले हालको सिद्धिचरण नगरपालिका १२ मा रहेको ओखल जस्तो गहिरो खोपिल्टो परेको ढुंगामा मुसलको सहायताले धान कुटी खाएकाले त्यसैको आधारमा पूरै जिल्लाको नाम ओखलढुंगा रहन गएको भन्ने भनाई पनि छ ।

त्यसैगरी मल्लकालीन समयमा काठमाण्डौका राजा लक्ष्मीनरसिंह मल्लले राज्य विस्तारको क्रममा काजी भीम मल्ललाई यस भेगमा पठाएका र उनको फौजले पूर्व विजय गर्दै यस ठाउँमा आई यहाँ राज्य चलाइरहेका किरातहरूलाई लखेटी लुटेको धान यहाँको ठूलो ओखल जस्तो ढुंगामा कुटी खाएकाले यस ठाउँको नाम ओखलढुंगा रहन गएको हो भन्ने जनश्रुति पाइन्छ । जे होस् जिल्लाकै पहिचान बोकेको उक्त ढुंगाको ओखल हालको ओखलढुंगा जिल्ला सदरमुकामस्थित सिद्धिचरण नगरपालिकाको वडा नम्बर १२ मा जोसुकैले सहजै अवलोकन गर्न सक्ने गरी सुरक्षित रूपमा राखिएको छ ।

ओखलढुंगा जिल्ला साहित्यिक पर्यटनका हिसाबले पनि अगाडि रहेको जिल्ला हो । युगकवि सिद्धिचरण श्रेष्ठको जन्मथलो यही जिल्लाको सदरमुकामस्थित सिद्धिचरण नगरपालिका वडा नं. १२ मा रहेको छ । उनको जन्मथलोलाई हाल व्यवस्थित बनाइएको छ । जहाँ युगकविको प्रतिमा र पार्क स्थापना गरिएको छ ।

युगकवि सिद्धिचरण श्रेष्ठको जन्मथलो र ओखलको ढुंगा हेर्न भनेर आन्तरिक तथा बाह्य पर्यटकहरू आइरहने गर्छन् । जिल्ला सदमुकाम क्षेत्रमै थामडाँडा, स्रष्टापार्क लगायतका ठाउँले पर्यटक लोभ्याउँदै आएका छन् । ओखलढुंगा बजारसँगै जोडिएको छ, बकुन्दे सामुदायिक वन । जसले गर्दा ओखलढुंगा सदरमुकामलाई सुन्दर र हरियाली देखाउँछ । नेपालका ठूला सहरहरू काठमाडौं तथा विराटनगरबाट सहज यातायात भएका कारण पनि सदरमुकाम क्षेत्रमा पर्यटकहरूको आवगमन भइरहन्छ ।

प्रकाशित मिति: आइतबार, कात्तिक ३, २०७६ २३:५०

प्रतिक्रिया दिनुहोस्