पलापु क्षेत्रमा कपास खेती गरिँदै

कृषि

गृहपृष्ठ
कृषि
पलापु क्षेत्रमा कपास खेती गरिँदै

पलापु क्षेत्रमा कपास खेती गरिँदै

आइतबार, कात्तिक ३, २०७६ SoftNEP

ओखलढुंगा । सुख्खाग्रस्त ओखलढुंगाको चम्पादेवी गाउँपालिका वडा नं. १ र २ पलापुमा कपास खेती विस्तार गरिने भएको छ । सुख्खा सहने बालीका रुपमा परिचित कपास खेतीलाई पकेट क्षेत्रकै रुपमा विस्तार गर्ने गाउँपालिकाले योजना अगाडि सारेको छ ।

चम्पादेवी गाउँपालिका वडा नं. १ र २ को पलापु गाउँमा केही पुस्ता अघिसम्म प्रशस्तै कपास खेती हुने गरेको थियो । सुख्खाग्रस्त यो गाउँमा कपास खेतीको विकल्प थिएन । समय परिवर्तनसँगै रेडीमेट र मेशिनबाट बुनिएका थानका कपडाको सहज उपलब्धतासँगै यो गाउँमा उत्पादित कपास खेती र खाडीका कपडा लोप हुँदै गयो । कपास खेतीको ठाउँमा निर्वाहमुखी खाद्यवालीले ठाउँ पाउँदै गयो । तर सुख्खाग्रस्त क्षेत्र भएकै कारण निर्वाहमुखी खाद्यवालीका रुपमा लगाइएको मकै, कोदो उतिसाह्रो मौलाउन सकेन । बर्सेनि खडेरीले यो गाउँका किसानहरु समस्यामा पर्दै आएका थिए । ११ सयभन्दा बढी घरधुरी रहेको यो गाउँमा खाद्यबाली उब्जाउ हुन छाडेपछि युवाहरु विदेशिने क्रम बढ्दो थियो । यस्तो समस्या समाधान गर्नका लागि पलापु गाउँमा सुख्खा सहने बालीका रुपमा चिनिने कपास खेती सुरु गर्न चम्पादेवी गाउँपालिकाले अहिले अभियान थालेको चम्पादेवी गाउँपालिकाका अध्यक्ष नवराज केसीले बताए ।

चम्पादेवी गाउँपालिकाले पलापु गाउँमा कपास खेती र वडा नं. ७, ८ र ९ मा अलैंची खेती विस्तारका लागि हालसम्म २० लाख रुपैयाँ विनियोजन गरिसकेको छ । जसबाट हाल कपासका बेर्ना उत्पादनको काम भइरहेको छ । निजी, सामुदायिक र वन क्षेत्रको जग्गामा कपास खेती गरेर स्थानीयस्तरमै कपास उत्पादन गरेर कपासबाट घरेलु उद्योग सञ्चालन गर्ने गाउँपालिकाको तयारी छ ।

प्रकाशित मिति: आइतबार, कात्तिक ३, २०७६ ०६:४१

प्रतिक्रिया दिनुहोस्